హైదరాబాద్ (జూన్ 01): Ban on Transfers of employees in Telangana 2026. తెలంగాణలో ప్రభుత్వ ఉద్యోగుల బదిలీల (Telangana Employees Transfers) ప్రక్రియపై రాష్ట్ర ప్రభుత్వం కీలక నిర్ణయం తీసుకుంది. గత నెలలో ఇచ్చిన బదిలీల సడలింపు గడువు ముగియడంతో, జూన్ 1, 2026 నుంచి ఉద్యోగుల బదిలీలపై పూర్తిస్థాయి నిషేధం (Ban on transfers of employees) విధిస్తూ ఆర్థిక శాఖ తాజాగా G.O.Ms.No. 57 ఉత్తర్వులను జారీ చేసింది.
Ban on Transfers of employees in Telangana 2026
ప్రభుత్వం జారీ చేసిన జీవో 57 (G.O.Ms.No. 57) ప్రకారం.. జూన్ 1, 2026 నుంచి అన్ని రకాల బదిలీలపై నిషేధం అమల్లోకి వస్తుంది. అయితే, పరిపాలనా సౌలభ్యం మరియు అత్యవసర పరిస్థితులను దృష్టిలో ఉంచుకుని క్రింది సందర్భాలలో మాత్రమే బదిలీలకు మినహాయింపు ఇచ్చారు:
- పదోన్నతులు (Promotions): ఉద్యోగులకు ప్రమోషన్లు లభించినప్పుడు, ఇతర ఉద్యోగులను స్థానచలనం చేయకుండా ఖాళీగా ఉన్న పోస్టుల్లో మాత్రమే వారిని నియమించాలి.
- పోస్టుల రద్దు మరియు క్రమశిక్షణా చర్యలు: పోస్టుల రద్దు (Disbandment of posts), రివర్షన్లు, డెప్యుటేషన్లు, లేదా క్రమశిక్షణా చర్యల (Disciplinary proceedings) కారణంగా బదిలీ చేయాల్సి వస్తే, ప్రస్తుతం ఉన్న ఖాళీల్లోనే సర్దుబాటు చేయాలి.
- దీర్ఘకాలిక సెలవుల అనంతరం: ఆరు నెలల కంటే ఎక్కువ కాలం సుదీర్ఘ సెలవుపై వెళ్లి తిరిగి విధుల్లో చేరే ఉద్యోగులను ఖాళీగా ఉన్న స్థానాల్లో నియమించడానికి అనుమతి ఉంటుంది.
ఆరు నెలల వరకు ఎలాంటి సడలింపులు ఉండవు!
ముఖ్య గమనిక: జూన్ 1, 2026 నుంచి రాబోయే ఆరు నెలల కాలం వరకు ఉద్యోగుల బదిలీల నిషేధాన్ని సడలించే ఎలాంటి ప్రతిపాదనలను కూడా ప్రభుత్వం స్వీకరించదు. ఒకవేళ ఆరు నెలల తర్వాత బదిలీల నిషేధాన్ని సడలించాల్సి వస్తే.. సంబంధిత శాఖా మంత్రి, ఆర్థిక మంత్రి, ఆర్థిక శాఖ కార్యదర్శి మరియు ప్రధాన కార్యదర్శి ద్వారా ఫైల్‌ను గౌరవ ముఖ్యమంత్రి (Chief Minister) ఆమోదానికి పంపాల్సి ఉంటుంది.
నిబంధనలు ఉల్లంఘిస్తే జీతాల నిలిపివేత!
ఈ ఉత్తర్వులను అన్ని ప్రభుత్వ శాఖల సెక్రటేరియట్ విభాగాలతో పాటు శాఖాధిపతులు (Heads of Departments) ఖచ్చితంగా పాటించాలని ప్రభుత్వం ఆదేశించింది. ఒకవేళ ఈ నిబంధనలకు విరుద్ధంగా ఎవరినైనా బదిలీ చేస్తే, సదరు ఉద్యోగుల జీతాల బిల్లులను (Pay bills) ఆమోదించవద్దని ట్రెజరీ అండ్ అకౌంట్స్ డైరెక్టర్‌కు ప్రభుత్వం స్పష్టమైన ఆదేశాలు జారీ చేసింది.
