హైదరాబాద్ (జూలై 01) : Telangana Inter board MOUs with RIT and MSN. తెలంగాణలోని ప్రభుత్వ జూనియర్ మరియు వృత్తి విద్యా కాలేజీల విద్యార్థులకు, అధ్యాపకులకు రాష్ట్ర ప్రభుత్వం సరికొత్త అవకాశాలను అందుబాటులోకి తెచ్చింది. విద్యార్థుల్లో నైపుణ్యాలను పెంచి, నేరుగా ఉపాధి అవకాశాలు కల్పించడమే లక్ష్యంగా తెలంగాణ ఇంటర్మీడియట్ విద్యా శాఖ ఇటీవల రెండు ప్రతిష్టాత్మక సంస్థలతో కీలక అవగాహన ఒప్పందాలు (MoUs) కుదుర్చుకుంది.
Telangana Inter board MOUs with RIT and MSN
ప్రముఖ సాంకేతిక విద్యా సంస్థ ‘రేడియంట్ ఇన్స్టిట్యూట్ ఆఫ్ టెక్నాలజీ’ (RIT) మరియు ప్రముఖ ఫార్మా దిగ్గజం ‘MSN లాబొరేటరీస్’ లతో ఈ ఒప్పందాలు జరిగాయి.
1. రేడియంట్ ఇన్స్టిట్యూట్తో ఒప్పందం: ఉచిత ఫ్యాకల్టీ మరియు స్టూడెంట్ ట్రైనింగ్
ప్రభుత్వ జూనియర్ వృత్తి విద్యా కాలేజీల్లో (Government Junior Vocational Colleges) నైపుణ్యాభివృద్ధిని బలోపేతం చేసేందుకు రేడియంట్ ఇన్స్టిట్యూట్ ఆఫ్ టెక్నాలజీ (RIT), హైదరాబాద్తో ఇంటర్మీడియట్ విద్యా శాఖ చేతులు కలిపింది.
ఈ ఒప్పందం వల్ల కలిగే ప్రయోజనాలు:
- ఉచిత ఫ్యాకల్టీ డెవలప్మెంట్ (FDP): ప్రభుత్వ వృత్తి విద్యా కాలేజీల లెక్చరర్లకు సరికొత్త సాంకేతికతలపై హ్యాండ్స్-ఆన్ ట్రైనింగ్ ఇస్తారు.
- ఆన్-ది-జాబ్ ట్రైనింగ్ (OJT): ET, ECT, మరియు ME కోర్సులు చదువుతున్న వృత్తి విద్యా విద్యార్థులకు పరిశ్రమల అవసరాలకు తగ్గట్టుగా ఉచిత ఆన్-ది-జాబ్ శిక్షణ అందిస్తారు.
ఈ కార్యక్రమ ఒప్పంద వేడుకలో ఇంటర్మీడియట్ విద్యా శాఖ డైరెక్టర్ శ్రీమతి అభిలాషా అభినవ్, IAS మాట్లాడుతూ…
”పరిశ్రమలకు, విద్యాసంస్థలకు మధ్య ఉన్న వ్యత్యాసాన్ని తగ్గించడానికి ఈ ఉచిత నాణ్యమైన శిక్షణ ఎంతగానో తోడ్పడుతుంది. విద్యార్థులను ఉద్యోగాలకు సిద్ధం చేయడంలో ఈ MoU కీలక పాత్ర పోషిస్తుంది.” అని పేర్కొన్నారు.
2. MSN లాబొరేటరీస్తో ఒప్పందం: ఫార్మా రంగంలో బంపర్ ఉద్యోగాలు
మరోవైపు, ఇంటర్మీడియట్ పూర్తి చేసిన విద్యార్థులకు నేరుగా ఫార్మా రంగంలో కెరీర్ అవకాశాలు కల్పించేందుకు ప్రముఖ ఫార్మా కంపెనీ MSN లాబొరేటరీస్ ముందుకు వచ్చింది. ఇందుకు సంబంధించి ఇంటర్మీడియట్ విద్యా శాఖతో MSN ల్యాబ్స్ ఒప్పందం చేసుకుంది.
అర్హతలు మరియు ఎంపిక వివరాలు:
- ఎవరెవరు అర్హులు?: ఇంటర్మీడియట్ లో MPC, BiPC, MLT, మరియు ఫార్మా టెక్నాలజీ (Pharma Technology) కోర్సులు పూర్తి చేసిన విద్యార్థులు.
- ఉత్తీర్ణత సంవత్సరం: 2023 నుండి 2026 విద్యా సంవత్సరాల మధ్య ఇంటర్ పూర్తి చేసిన విద్యార్థులకు ఈ సువర్ణావకాశం ఉంటుంది.
ఈ సందర్భంగా MSN ల్యాబ్స్ హెచ్ఆర్ వైస్ ప్రెసిడెంట్ శ్రీ కె. ఎల్. ఎన్. మూర్తి మాట్లాడుతూ…
”యువతలోని ప్రతిభను ప్రోత్సహించడం, వారికి మెరుగైన కెరీర్ అందించడమే మా లక్ష్యం. తెలంగాణ ప్రభుత్వంతో కుదిరిన ఈ భాగస్వామ్యం ద్వారా యువతకు ఉపాధి కల్పించడంతో పాటు, దేశీయ ఫార్మా రంగ వృద్ధిలో వారిని భాగస్వాములను చేస్తాం.” అని తెలిపారు
