హైదరాబాద్, అక్టోబర్ 8: Telangana student innovation hackathon 2026. తెలంగాణ ఇంటర్మీడియట్ విద్యార్థుల్లో సృజనాత్మకత, సమస్య పరిష్కార నైపుణ్యాలు, డిజిటల్ సామర్థ్యం, ఆర్టిఫిషియల్ ఇంటెలిజెన్స్‌ (AI)పై అవగాహన పెంచేందుకు రాష్ట్ర ఇంటర్మీడియట్ విద్యా శాఖ కీలక కార్యక్రమాన్ని ప్రారంభించింది.
Telangana student innovation hackathon 2026
“తెలంగాణ స్టూడెంట్ ఇన్నోవేషన్ హ్యాకథాన్ – ఇన్నోవేట్ తెలంగాణ 2026” పేరుతో 15 రోజుల రాష్ట్రస్థాయి హ్యాకథాన్‌ను నిర్వహించనుంది. ఈ కార్యక్రమంలో జనరల్, వొకేషనల్ విభాగాలకు చెందిన ఇంటర్మీడియట్ మొదటి, రెండో సంవత్సరం విద్యార్థులు పాల్గొనవచ్చు.
అక్టోబర్ 12 నుంచి విద్యార్థుల రిజిస్ట్రేషన్
ఈ హ్యాకథాన్‌లో పాల్గొనాలనుకునే విద్యార్థులు 2026 అక్టోబర్ 12 నుంచి అక్టోబర్ 17 వరకు రిజిస్ట్రేషన్ చేసుకోవాలి. అక్టోబర్ 17 సాయంత్రం 5 గంటల వరకు రిజిస్ట్రేషన్‌కు అవకాశం ఉంటుంది. విద్యార్థులు తమ కళాశాల నోడల్ అధికారి పర్యవేక్షణలో telangana.codemitra.org పోర్టల్ ద్వారా నమోదు చేసుకోవాలి.
హ్యాకథాన్‌ను CodeMitra Future Skills Platform ద్వారా నిర్వహిస్తున్నారు. విద్యార్థులు తొలుత హ్యాకథాన్ సంసిద్ధతా కోర్సును పూర్తి చేసి, అనంతరం వాస్తవ జీవిత సమస్యలను గుర్తించి వాటికి వినూత్న పరిష్కారాలను రూపొందించాలి. ప్రాజెక్ట్ లేదా ప్రోటోటైప్‌ను సమర్పించిన తర్వాత నిపుణుల మూల్యాంకనం, పరిశ్రమల పరిచయం, రాష్ట్రస్థాయి ప్రదర్శన వంటి దశలు ఉంటాయి.
హ్యాకథాన్‌లో ముఖ్యమైన అంశాలు
విద్యార్థులు పలు కీలక రంగాల్లో తమ ఆలోచనలు, ప్రాజెక్టులను రూపొందించవచ్చు. వాటిలో:
- విద్య & అభ్యసనం – విద్యను సులభతరం, ఆకర్షణీయంగా మార్చే పరిష్కారాలు
- ఆరోగ్యం & శ్రేయస్సు – ఆరోగ్యం, పరిశుభ్రత, మానసిక ఆరోగ్యం, భద్రత
- పర్యావరణం & సుస్థిరత – వ్యర్థాల నిర్వహణ, నీటి సంరక్షణ, స్వచ్ఛ ఇంధనం
- స్మార్ట్ కమ్యూనిటీస్ – ప్రజా సేవలు, గ్రామాలు, నగరాలు, మౌలిక సదుపాయాల ఆధునీకరణ
- వ్యవసాయం & గ్రామీణ ఆవిష్కరణలు – రైతులు, గ్రామీణ ప్రజల సమస్యలకు సాంకేతిక పరిష్కారాలు
- సామాజిక మేలు కోసం టెక్నాలజీ – AI, కోడింగ్, డిజిటల్ టూల్స్ వినియోగం
- సమగ్రత & ప్రాప్యత – దివ్యాంగులు, అణగారిన వర్గాల కోసం పరిష్కారాలు
- భవిష్యత్ ఆవిష్కరణలు – భవిష్యత్ సవాళ్లకు సాంకేతిక పరిష్కారాలు.
Also Read…
• తాజా విద్యా సమాచారం
• తాజా జాబ్ నోటిఫికేషన్స్
• ఉచిత ఆన్లైన్ టెస్ట్స్
• కరెంట్ అఫైర్స్
• జీకే బిట్స్
• ఎంప్లాయిస్ న్యూస్
హ్యాకథాన్ ముఖ్యమైన తేదీలు
| దశ | కార్యక్రమం | తేదీ / గడువు |
|---|---|---|
| 1 | విద్యార్థుల రిజిస్ట్రేషన్ | అక్టోబర్ 12–17, 2026 |
| 2 | లెర్నింగ్ స్ప్రింట్ & ప్రాజెక్ట్ సమర్పణ | అక్టోబర్ 17–22, 2026 |
| 3 | జాబితా క్రోడీకరణ & ప్రాథమిక పరిశీలన | అక్టోబర్ 23–24, 2026 |
| 4 | రాష్ట్రస్థాయి నిపుణుల మూల్యాంకనం | అక్టోబర్ 26, 2026 |
| 5 | పరిశ్రమల సందర్శన & మెంటార్‌షిప్ | అక్టోబర్ 27–28, 2026 |
| 6 | రాష్ట్రస్థాయి ప్రదర్శన & గ్రాండ్ ఫినాలే | తేదీ త్వరలో ప్రకటిస్తారు |
రాష్ట్రస్థాయి మూల్యాంకనాన్ని ఐదుగురు సీనియర్ జూనియర్ లెక్చరర్లతో కూడిన నిపుణుల కమిటీ నిర్దేశిత రూబ్రిక్ ఆధారంగా నిర్వహించనుంది. ఎంపికైన విద్యార్థులకు ప్రముఖ కార్పొరేట్ సంస్థల సందర్శనతో పాటు ఐటీ రంగ నిపుణులు, మెంటార్లతో ప్రత్యక్షంగా మాట్లాడే అవకాశం కల్పిస్తారు.
టాప్-3 టీమ్‌లకు ప్రత్యేక బహుమతులు
హ్యాకథాన్‌లో కోర్సును విజయవంతంగా పూర్తి చేసిన అన్ని విద్యార్థులకు ప్రశంసా పత్రాలు అందజేస్తారు. రాష్ట్రస్థాయిలో అత్యుత్తమ ప్రతిభ కనబరిచిన టాప్-3 టీమ్‌లకు ఆకర్షణీయమైన బహుమతులు, ప్రోత్సాహకాలు అందించనున్నారు. గ్రాండ్ ఫినాలేలో ఎంపికైన విద్యార్థులు రాష్ట్రస్థాయి జ్యూరీ ముందు తమ ప్రోటోటైప్‌లను ప్రదర్శించాల్సి ఉంటుంది.
కళాశాలలకు కీలక సూచనలు
ప్రభుత్వ జూనియర్ కళాశాలల ప్రిన్సిపాళ్లు తమ కళాశాల నుంచి ఒక సీనియర్ జూనియర్ లెక్చరర్‌ను నోడల్ ఆఫీసర్‌గా నియమించి, విద్యార్థులు హ్యాకథాన్‌లో పాల్గొనేలా ప్రోత్సహించాలని ఇంటర్మీడియట్ విద్యా శాఖ సూచించింది.
