BIKKI NEWS (Nov. 15) : CM Revanth Reddy meets PM Modi. తెలంగాణలో దీర్ఘకాలంగా పెండింగ్‌లో ఉన్న సాగునీటి ప్రాజెక్టుల అనుమతులు, అంతర్రాష్ట్ర జల వివాదాల పరిష్కారానికి కేంద్ర ప్రభుత్వం పూర్తి సహకారం అందించాలని ముఖ్యమంత్రి శ్రీ ఎ. రేవంత్ రెడ్డి ప్రధానమంత్రి శ్రీ నరేంద్ర మోదీకి విజ్ఞప్తి చేశారు. ఆదివారం న్యూఢిల్లీలోని ప్రధాని అధికారిక నివాసంలో జరిగిన ఈ కీలక సమావేశంలో కేంద్ర క్రీడలు, యువజన వ్యవహారాల శాఖ మంత్రి మన్‌సుఖ్ మాండవీయ, రాష్ట్ర నీటిపారుదల శాఖ మంత్రి ఎన్. ఉత్తమ్ కుమార్ రెడ్డి, రాష్ట్ర క్రీడలు, యువజన సర్వీసుల శాఖ మంత్రి వాకిటి శ్రీహరి పాల్గొన్నారు.
CM Revanth Reddy meets PM Modi
తమ ప్రభుత్వం అధికారంలోకి వచ్చిన తర్వాత రాష్ట్రంలో సాగునీటి ప్రాజెక్టుల పనులను వేగవంతం చేశామని, భూ నిర్వాసితులకు పరిహారాన్ని త్వరితగతిన అందజేస్తున్నామని సీఎం రేవంత్ రెడ్డి ప్రధానికి వివరించారు.
తుమ్మిడిహెట్టి ప్రాజెక్టుకు మహారాష్ట్రను ఒప్పించండి
ప్రాణహిత నదిపై +152 మీటర్ల ఎత్తులో తుమ్మిడిహెట్టి ప్రాజెక్టు నిర్మాణానికి మహారాష్ట్ర ప్రభుత్వాన్ని ఒప్పించాలని ప్రధాని మోదీని సీఎం కోరారు. ఇటీవల మహారాష్ట్ర ముఖ్యమంత్రి దేవేంద్ర ఫడ్నవీస్‌తో తాను భేటీ అయిన విషయాన్ని ప్రధాని దృష్టికి తీసుకెళ్లారు. మహారాష్ట్రలో ముంపునకు గురయ్యే ప్రాంతాలకు అవసరమైన పరిహారం ఇచ్చేందుకు తెలంగాణ సిద్ధంగా ఉందని స్పష్టం చేశారు. ఈ ప్రాజెక్టు పూర్తయితే తెలంగాణలోని వెనుకబడిన, గిరిజన ప్రాంతాల సాగు, తాగునీటి అవసరాలకు గ్రావిటీ (గురుత్వాకర్షణ) ద్వారా నీటిని అందించే వీలు కలుగుతుందని వివరించారు.
పాలమూరు-రంగారెడ్డి సహా పెండింగ్ ప్రాజెక్టులకు పర్యావరణ అనుమతులు
- డాక్టర్ ఎస్. జైపాల్‌రెడ్డి పాలమూరు-రంగారెడ్డి ఎత్తిపోతల పథకం (PRLIS)
- సీతమ్మ సాగర్ బహుళార్థసాధక ప్రాజెక్టు (SSMP)
- డిండి ఎత్తిపోతల పథకం (DLIS)
ఈ ప్రాజెక్టులపై రాష్ట్ర ప్రభుత్వం ఇప్పటికే భారీగా వ్యయం చేసినప్పటికీ, పర్యావరణ మరియు ఇతర చట్టబద్ధమైన అనుమతులు పెండింగ్‌లో ఉండటం వల్ల ప్రజలకు తాగునీటి ప్రయోజనాలు అందడం లేదని సీఎం ఆవేదన వ్యక్తం చేశారు. పర్యావరణ అనుమతుల విషయంలో ఇటీవల సుప్రీంకోర్టు సానుకూల తీర్పు ఇచ్చినందున, ఏమాత్రం ఆలస్యం లేకుండా అనుమతులు మంజూరయ్యేలా చూడాలని విజ్ఞప్తి చేశారు.
సమ్మక్క సాగర్ ప్రాజెక్టుకు ఛత్తీస్‌గఢ్ NOC ఇప్పించాలి
సమ్మక్క సాగర్ ప్రాజెక్టుకు సంబంధించిన సమగ్ర ప్రాజెక్టు నివేదికను (DPR) ఇప్పటికే కేంద్ర జల సంఘానికి (CWC) సమర్పించామని సీఎం తెలిపారు. ఈ ప్రాజెక్టు వల్ల ఛత్తీస్‌గఢ్‌లో ముంపునకు గురయ్యే భూమి, గ్రామాల అంచనా కోసం పూర్తి స్థాయి నీటిమట్టం (FRL), బ్యాక్ వాటర్ స్థాయి గుర్తింపు సర్వేకు రూ. 9.88 కోట్లు చెల్లించిన విషయాన్ని ప్రధానికి వివరించారు. ఛత్తీస్‌గఢ్‌కు భూ పరిహారం చెల్లించేందుకు సిద్ధంగా ఉన్నామని, ఆ రాష్ట్రం నుంచి నిరభ్యంతర పత్రం (NOC) త్వరగా జారీ అయ్యేలా చొరవ చూపాలని కోరారు.
CM Revanth Reddy meets PM Modi – ‘సాస్కి’ కింద రూ. 5 వేల కోట్లు, పీఎంకేఎస్‌వై నిధుల కోసం అభ్యర్థన
రాష్ట్రంలో 70 నుంచి 90 శాతం మేర పనులు పూర్తయిన ప్రాజెక్టులను పూర్తి చేసేందుకు ‘సాస్కి’ (SASCI – Scheme for Special Assistance to States for Capital Investment) కింద తెలంగాణకు అదనంగా రూ. 5,000 కోట్లు మంజూరు చేయాలని సీఎం కోరారు. ఈ ఆర్థిక సంవత్సరంలోనే నిధులు విడుదలైతే కొత్త ఆయకట్టుతో పాటు స్థిరీకరించిన ఆయకట్టుకు సాగునీరు అందుతుందని, తద్వారా రైతుల ఆదాయం, గ్రామీణ ఉపాధి, ఆహార ధాన్యాల ఉత్పత్తి పెరుగుతుందని పేర్కొన్నారు.
అలాగే, ప్రధానమంత్రి కృషి సించాయి యోజన (PMKSY) కింద నాలుగు కీలక ప్రాజెక్టులకు నిధులు కేటాయించాలని విజ్ఞప్తి చేశారు:
CM Revanth Reddy meets PM Modi
| ప్రాజెక్టు పేరు | కోరిన నిధులు (రూ. కోట్లలో) |
|---|---|
| ఇంటిగ్రేటెడ్ సమ్మక్క సాగర్ – సీతారామ ఎత్తిపోతల పథకం | ₹5,183 కోట్లు |
| మోడికుంట వాగు ప్రాజెక్టు | ₹392 కోట్లు |
| చిన్న కాళేశ్వరం ప్రాజెక్టు | ₹171 కోట్లు |
| చనాకా-కొరాటా బ్యారేజీ | ₹103 కోట్లు |
5. ‘ఖేలో ఇండియా యూత్ గేమ్స్ – 2026’ వేడుకలకు ప్రధానికి ఆహ్వానం
డిసెంబర్ 11 నుంచి 22వ తేదీ వరకు హైదరాబాద్ వేదికగా జరగనున్న ‘ఖేలో ఇండియా యూత్ గేమ్స్ – 2026’ ప్రారంభ మరియు ముగింపు వేడుకలకు ముఖ్య అతిథిగా హాజరుకావాలని ప్రధాని మోదీని సీఎం రేవంత్ రెడ్డి సాదరంగా ఆహ్వానించారు. ఈ సందర్భంగా ప్రధానికి ఆహ్వాన పత్రికను అందించడంతో పాటు క్రీడల లోగో, మస్కట్ విశేషాలను వివరించారు.
భవిష్యత్తులో ఆసియా క్రీడలు, ఒలింపిక్స్ వంటి అంతర్జాతీయ పోటీల్లో భారత్ తరఫున పతకాలు సాధించేందుకు యువ క్రీడాకారులకు ఈ పోటీలు చక్కని వేదికగా నిలుస్తాయని సీఎం అన్నారు. గతంలో 2002లో జాతీయ క్రీడలు, 2007లో ప్రపంచ మిలిటరీ క్రీడలను అత్యంత విజయవంతంగా నిర్వహించిన ఘన చరిత్ర తెలంగాణకు ఉందని ప్రధాని దృష్టికి తీసుకెళ్లారు.
