BIKKI NEWS (OCT. 01) : Telangana PRC report not submitted. తెలంగాణలో రెండో పీఆర్సీ నివేదిక వ్యవహారం మరోసారి చర్చనీయాంశంగా మారింది. పీఆర్సీ కమిటీకి ప్రభుత్వం ఇచ్చిన గడువు 2026 సెప్టెంబర్‌ 30తో ముగిసినా, ఇప్పటివరకు నివేదిక ప్రభుత్వానికి చేరలేదని ఉద్యోగ సంఘాలు ఆందోళన వ్యక్తం చేస్తున్నాయి.
Telangana PRC report not submitted
నివేదికను వెంటనే తెప్పించి ఉద్యోగుల సమస్యలకు పరిష్కారం చూపాలని ఉద్యోగ సంఘాలు డిమాండ్‌ చేస్తున్నాయి. గతంలో గడువు పొడిగించిన నేపథ్యంలో మరోసారి పీఆర్సీ కమిటీ గడువు పెంచే అవకాశం ఉందన్న చర్చ కూడా జరుగుతోంది.
39 నెలలుగా పీఆర్సీ కోసం ఎదురుచూపులు
రాష్ట్రంలోని ఉద్యోగులు, ఉపాధ్యాయులకు 2023 జూలై 1 నుంచి రెండో పీఆర్సీ అమలు కావాల్సి ఉంది. గత ప్రభుత్వం రిటైర్డ్‌ ఐఏఎస్‌ శివశంకర్‌ అధ్యక్షతన పీఆర్సీ కమిటీని ఏర్పాటు చేసింది. కమిటీకి ఇచ్చిన గడువు ఇప్పటికే ఒకసారి పొడిగించగా, తాజాగా సెప్టెంబర్‌ 30తో ఆ గడువు కూడా ముగిసింది. పీఆర్సీ అమలు ఆలస్యం కావడంతో దాదాపు 39 నెలలుగా ఉద్యోగులు, ఉపాధ్యాయులు, పెన్షనర్లు వేతన సవరణ కోసం ఎదురుచూస్తున్నారు. పెరుగుతున్న నిత్యావసరాల ధరల నేపథ్యంలో పీఆర్సీ ఆలస్యం తమపై ఆర్థిక భారాన్ని పెంచుతోందని ఉద్యోగ సంఘాలు చెబుతున్నాయి.
నాలుగు ప్రధాన డిమాండ్లపై ఉద్యోగుల ఒత్తిడి
ఉద్యోగుల జేఏసీ తొలుత 64 డిమాండ్లను ప్రభుత్వం ముందుంచినప్పటికీ, అనంతరం నాలుగు ప్రధాన డిమాండ్లపై ప్రధానంగా దృష్టి సారించింది. ఇందులో పెండింగ్‌లో ఉన్న డీఏల విడుదల, పాత పింఛన్‌ విధానం, సీపీఎస్‌ రద్దు, పీఆర్సీ అమలు వంటి అంశాలు కీలకంగా ఉన్నాయి. పెండింగ్‌లో ఉన్న ఐదు డీఏల్లో రెండు డీఏలపై ప్రభుత్వం నిర్ణయం తీసుకున్నప్పటికీ, మిగిలిన అంశాలపై స్పష్టత కోసం ఉద్యోగ సంఘాలు ఎదురుచూస్తున్నాయి. పీఆర్సీ నివేదికను తెప్పించి 51 శాతం ఫిట్‌మెంట్‌ ఇవ్వాలని, పెండింగ్‌ బిల్లుల విడుదలను వేగవంతం చేయాలని ఉద్యోగ సంఘాలు డిమాండ్‌ చేస్తున్నాయి.
ప్రభుత్వ హామీలపై ఉద్యోగ సంఘాల అసంతృప్తి
పీఆర్సీ నివేదికను త్వరగా తెప్పిస్తామని ప్రభుత్వం పలుమార్లు హామీ ఇచ్చిందని ఉద్యోగ సంఘాలు పేర్కొంటున్నాయి. 2026 మేలో సీఎం రేవంత్‌రెడ్డి ఉద్యోగుల జేఏసీ నేతలతో జరిగిన చర్చల్లో పీఆర్సీ నివేదికను తెప్పించేందుకు చర్యలు తీసుకుంటామని, జూన్‌ 2 నుంచి పీఆర్సీ అమలుపై హామీ ఇచ్చినట్లు సంఘాలు చెబుతున్నాయి. సెప్టెంబర్‌ నెలాఖరులోగా నివేదికను తెప్పిస్తామని డిప్యూటీ సీఎం భట్టి విక్రమార్క హామీ ఇచ్చారని, సెప్టెంబర్‌ 9న జరిగిన చర్చల్లో పది రోజుల్లో నివేదికను తెప్పిస్తామని సీఎస్‌ సంజయ్‌ జాజు చెప్పారని ఉద్యోగ సంఘాలు వెల్లడించాయి. అయితే గడువు ముగిసినా నివేదిక ప్రభుత్వానికి చేరకపోవడంతో అసంతృప్తి వ్యక్తమవుతోంది.
మళ్లీ ఉద్యమబాటలో ఉద్యోగులు?
పీఆర్సీ నివేదికను వెంటనే తెప్పించి, ఉద్యోగుల డిమాండ్లపై ప్రభుత్వం స్పష్టమైన నిర్ణయం తీసుకోకపోతే మరోసారి ఉద్యమ కార్యాచరణ చేపట్టాలని ఉద్యోగుల జేఏసీ భావిస్తున్నట్లు తెలుస్తోంది. సెప్టెంబర్‌ 23న ఎంసీఆర్‌హెచ్‌ఆర్‌డీలో జరిగిన చర్చల్లో పీఆర్సీ నివేదిక సీల్డ్‌ కవర్‌లో ప్రభుత్వానికి వస్తుందని, అనంతరం ప్రభుత్వం దానిని పరిశీలిస్తుందని ప్రభుత్వ ప్రతినిధులు పేర్కొన్నట్లు ఉద్యోగ సంఘాలు తెలిపాయి. ఇదిలా ఉండగా, రాష్ట్రంలో రానున్న ఎన్నికల నేపథ్యంలో ఎన్నికల కోడ్‌ అమల్లోకి వస్తే ఉద్యోగుల డిమాండ్ల పరిష్కారానికి మరింత ఆలస్యం జరిగే అవకాశం ఉందని సంఘాలు ఆందోళన వ్యక్తం చేస్తున్నాయి. తెలంగాణ పీఆర్సీ రిపోర్ట్‌, ఫిట్‌మెంట్‌, ఉద్యోగుల డీఏలు, సీపీఎస్‌ రద్దు, పాత పింఛన్‌ విధానం వంటి అంశాలపై ప్రభుత్వం తీసుకునే తదుపరి నిర్ణయాలపై ఉద్యోగులు, ఉపాధ్యాయులు, పెన్షనర్లు ఆసక్తిగా ఎదురుచూస్తున్నారు.
Also Read…
• తాజా విద్యా సమాచారం
• తాజా జాబ్ నోటిఫికేషన్స్
• ఉచిత ఆన్లైన్ టెస్ట్స్
• కరెంట్ అఫైర్స్
• జీకే బిట్స్
• ఎంప్లాయిస్ న్యూస్
