BIKKI NEWS (Nov. 17) : Inter Merger syllabus change update. తెలంగాణలో ఇంటర్మీడియట్ విద్యను పాఠశాల విద్యాశాఖలో విలీనం చేస్తున్న నేపథ్యంలో 11, 12 తరగతుల సిలబస్పై ఇంటర్ బోర్డు కీలక స్పష్టతనిచ్చింది. విలీన ప్రక్రియ జరిగినప్పటికీ, 11, 12 తరగతుల సిలబస్లో కొత్తగా ఎలాంటి మార్పులు ఉండవని బోర్డు స్పష్టం చేసింది.
Inter Merger syllabus change update
సోమవారం సచివాలయంలో ప్రభుత్వ ప్రత్యేక సలహాదారు కె. కేశవరావు అధ్యక్షతన విద్యాసంస్కరణలపై విస్తృత స్థాయి సంప్రదింపుల సమావేశం జరిగింది. ఈ సమావేశంలో విద్యాశాఖ కార్యదర్శి యోగితారాణా, టీజీసీహెచ్ఈ (TGCHE) చైర్మన్ బాలకిష్టారెడ్డి, ఇంటర్ బోర్డు సెక్రటరీ అభిలాష అభినవ్, టీచర్ ఎమ్మెల్సీలు పింగిలి శ్రీపాల్ రెడ్డి, మల్క కొమరయ్య, ఏవీఎన్ రెడ్డి, వివిధ విశ్వవిద్యాలయాల వీసీలు, గురుకుల సొసైటీల కార్యదర్శులు పాల్గొన్నారు.
ఇంటర్మీడియట్ సిబ్బంది ప్రయోజనాలకు రక్షణ
ఈ విలీన ప్రక్రియలో ఇంటర్ బోర్డు, కమిషనరేట్ బోధన మరియు బోధనేతర సిబ్బంది సర్వీస్ నిబంధనలు, ప్రయోజనాలకు పూర్తి రక్షణ కల్పిస్తామని ప్రభుత్వం హామీ ఇచ్చింది.
సమావేశంలోని ముఖ్యాంశాలు
- విద్యార్థి కేంద్రంగా ముసాయిదా: 11వ తరగతి సిలబస్ను ఇప్పటికే నిర్ణయించిన షెడ్యూల్ ప్రకారం సవరించామని, 12వ తరగతి సిలబస్ సవరణ కూడా ప్రణాళిక ప్రకారం కొనసాగుతోందని ఇంటర్ బోర్డు సెక్రటరీ అభిలాష అభినవ్ తెలిపారు. వీటికి అదనంగా కొత్త మార్పులు ఏవీ ఉండవని, సిలబస్ మార్పులపై వస్తున్న ఊహాగానాలను నమ్మొద్దని ఆమె విద్యార్థులు, తల్లిదండ్రులకు విజ్ఞప్తి చేశారు. నూతన విధానం పూర్తిగా విద్యార్థి కేంద్రంగానే ఉంటుందని, ప్రభుత్వం త్వరలోనే ముసాయిదా మార్గదర్శకాలను సిద్ధం చేస్తోందని పేర్కొన్నారు.
- డ్రాపౌట్ల నివారణే లక్ష్యం: విద్యార్థులు 10వ తరగతి తర్వాత మధ్యలోనే చదువు మానేయకుండా ‘ఎడ్యుకేషనల్ కంటిన్యుటీ’ (విద్యా కొనసాగింపు) కల్పించడమే లక్ష్యంగా ఈ సంస్కరణలు చేపడుతున్నట్లు కేశవరావు వెల్లడించారు. 1 నుంచి 12వ తరగతి వరకు ఒకే విధానాన్ని అమలు చేయాలని విద్యావేత్తలు సూచించారు.
- సంపూర్ణ వ్యక్తిత్వ వికాసం: విద్య కేవలం ఇంజినీరింగ్, మెడికల్ కోచింగ్లకు మాత్రమే పరిమితం కాకుండా విద్యార్థుల సంపూర్ణ వ్యక్తిత్వ వికాసానికి దోహదపడాలని సమావేశంలో పాల్గొన్న మేధావులు అభిప్రాయపడ్డారు. ఇంటర్ విలీనాన్ని వారు ఏకగ్రీవంగా స్వాగతించారు.
ప్రభుత్వ, ప్రైవేట్ విద్యాసంస్థల ప్రతినిధులు, తల్లిదండ్రులు, విద్యార్థుల నుంచి ఈ విద్యా సంస్కరణలకు సానుకూల స్పందన వస్తోందని అధికారులు తెలిపారు. అధికారిక ప్రకటనలను మాత్రమే విశ్వసించాలని విద్యాశాఖ సూచించింది.

