Poetry Day - "కవి ఏమవుతాడు" - ఉమాదేవి ప్రత్యేక కవిత

BIKKI NEWS (FEB. 20) : World Poetry day 2026 a poem by Addagudi Umadevi. ప్రపంచ కవితా దినోత్సవం సందర్భంగా అడ్డగూడి ఉమాదేవి రచించిన ప్రత్యేక కవిత.

ఆవేశాక్షర శరాలను సంధిస్తూ
సమసమాజ నిర్మాణానికి అంకుశమవుతాడు

పదనెక్కిన పదమై పద్మవ్యూహాలను ఛేదిస్తూ
అభ్యుదయ పథ దిక్సూచిలా సాగుతాడు

వడిగొను వాక్య వాతూలమై వర్ణాలను మట్టిలో కలుపుతూ నిచ్చెన మెట్లను కూల్చుతాడు

గర్జించు గ్రంథమై గురివిందగింజల నిజరూపుకు నిలువెత్తు సాక్షమౌతాడు

పేకమేడల కలల సౌధాలకు పునాదియై
చెదిరిన బతుకులకు చేయూతగ నిలుస్తాడు

నిశ్శబ్ద శబ్దాల సారమై మనసు పొరలను తాకుతూ
అనంత భావావేశ ఉత్తుంగ తరంగాల సింధువవుతాడు

అక్షరమై,పదమై,వాక్యమై,గ్రంథమై రవి గాంచని చోటుకు సాగుతూ
అక్షర శిల్పియై పొత్తమునేలుతాడు

అడ్డగూడి ఉమాదేవి
తెలుగు అధ్యాపకురాలు
సాంఘిక సంక్షేమ గురుకుల మహిళా డిగ్రి కళాశాల
వరంగల్
9908057980

Google News	@WHATSAPP
@TELEGRAM	@FACEBOOK

Poetry Day – “కవి ఏమవుతాడు” – ఉమాదేవి ప్రత్యేక కవిత